HMONG - A Pastoral Message from Bishop Loya

Thov kom Tswv Ntuj tus tsim peb pub nws lub txiaj ntsim thiab kev thaj yeeb rau nej, tuaj ntawm Tswv Ntuj leej tub Yes Xus, tus tau raug txoj kev tsim txom nrog peb, thiab tus, nws hlub peb thiab hlub txhua yam uas Tswv Ntuj tau tsim los, tau txais yeej txoj kev tuag thiab tau qhia kom peb tau txais txoj sia nyob mus li, nyob rau hauv Leej Ntuj Plig lub hwj chim.

Puag thaum lub hauv paus uas muaj lub Koom Txoos kev ntseeg los, lub caij Plaub Caug txhob txwm npaj los ua kev yoo tshaib, kev thov ntuj, thiab kev lees txhaum.  Cov ntseeg tau taug Yes Xus tus neev taw nyob teb chaw Suab Puam.  Lub caij no peb tawm tsam txoj kev phem ib yam li Yes Xus, uas nws tawm tsam txoj kev ntxias dag, txoj kev quab yuam caij tsuj, txoj kev khav theeb, thiab kev muaj plhus.  Peb tawm tsam kom peb thiaj li yuav tig tau peb lub neej rov qab,   kom tom qab lub caij pluab caug lawm peb ua lub neej pom kev thiab tau txais lub hwj chim ntawm txoj kev sawv rov qab los, tab txawm yog peb tseem ua neej nyob hauv lub ntiaj teb txoj kev txhaum thiab kev tuag los xij.

Thaum peb pib ua lub caij plaub caug no, peb paub zoo txog txoj kev tsim txom ntawm kev txhaum thiab txoj kev tuag uas tseem yuav nrog peb nyob mus  ntxiv.  Lub lis piam dhau los, peb twb tau pom txoj kev sib txeeb teb chaws, sib  ntaus sib tua ua tsov ua rog nyob rau hauv lub teb chaws Ukraine:  Lub Koom Haum Ntiaj teb nyuam qhuav tshaj tawm txog teeb meem kev kub txhov los ntawm huab cua: thiab peb nco qab ntsoov txog  txhua yam xwm tshwm sim txog kev ntxub ntxaug rau peb cov kwv tij uas lawm txawv nqaij txawv tawv.  Txhua yam no tshwm sim rau lub caij uas peb raug tus kab mob sib kis ua rau peb dhuav kawg nkaus li, txawm yog tus kab mob no twb tsawg zuj zus lawm los xij. 

Peb yuav ua li cas thiaj tiv taus ntau ntau yam ua rau peb tsis muaj kev cia siab li lawm?

"Nyem no, nej rau siab rov qab los cuag kuv. Nej yoo tshaib, nej quaj, nej nyiav zoo li cov ntoo xyom.  Nej tsis txhob ua nej tej tsho ntuag. Nej yuav ua nej lub siab ntuag thiaj yog. Nej rov qab los cuag nej tus HUAB TAIS Tswv Ntuj. Nws hlub nej mos nyoos. Nws khuv leej nej tas nrho, nws npau taws qeeb. Nws muaj paj tshab ntau. Nws tsis xav pom neeg ua phem.

Nej tshuab puab nyob Xis Yoos mas! Nej teem ib lub hnub nyoog yoo tshaib thiab nqaum paj nqaum nruas.  Nej hu tas tsoom pej xeem tuaj. Nej sau tas nej lub txoos tuaj. Nej sau cov laus huv si. Nej coj cov me nyuam tseem noj mis tuaj. Tus vauv yuav tso nws lub paim tseg. Tus nyab yuav tso nws lub txaj tseg.        Yos Es 2:12-13, 15-16.

Tab txawm yog lub caij zoo li tam sim no los, tej yam peb tej laus txheej thaum ub tau ua los kuj yog ib yam pab tshab.  Kuv ntseeg hais tias Tswv Ntuj hu cov Ntseeg Episcopal hauv lub Xeev Minnesota los ua tej pawg ntseeg me me los kawm kev ntseeg ua ke thiab koom ua neej ua ke, los ua ib lub teeb pom kev rau lub ntiaj teb txoj kev tsaus ntuj nti no.  Thaum peb sib sau ua ke thiab koom ua ib pawg ntseeg, koom siab koom ntsws ua ke, tawm tsam lub ntiaj teb txoj caij tsuj thiab tig rov los rau tus uas hlub peb, peb yuav rov nrhiav tau tus dej muaj txoj sia nyob rau hauv Yes Xus Pleev.  Yog Tswv Ntuj pom zoo peb yuav lub neej ua ke nrog cov neeg nyob ze peb yuav dhau mus ua ib lub qhov dej uas yog qhov tseeb txhawv ntawm Tswv Ntuj los, yuav yog Tswv Ntuj txoj kev ncaj ncess, thiab Tswv Ntuj txoj kev thaj yeeb hauv teb chaws suab puam uas yog txoj kev ntxias thiab kev ua txhaum.

Kuv sau tsab ntawv hnub no caw txhua tus neeg ntseeg Episcopalian hauv Minnesota los koom ua ke hauv lub caij Plaub Caug, thiab los ua peb yam ua ke li nram no:

Lees Kev txhaum thiab Yoo tshaib rau Tswv Ntuj txoj kev Ncaj Ncee

Muaj ntau ntau yam tshwm sim hauv ob lub xyoo dhau los, ua kev phem, hais lus phem, hais lus ntxias dag tsis muaj tseeb, hais tsis sib haum, ntxias dag tej neeg mus pov ntawv tej yam uas tsis tseeb, muaj kev vuab tsuab rau tej dej los huab cua thiab kev ntxub ntxaug muaj ntau zuj zus, rau hauv peb lub teb chaws no. Txij li thaum George Floyd tuag xyoo 2020, peb coob leej ntau tus uas yog cov neeg muaj ntsej muaj muag tau pom txog tej yam tob tob uas yog txoj kev txhaum uas peb tsi tau pom thiab paub los dua li.  Kuv xav tias tej zaum nej twb tau hnov kuv hais ntau ntau zaus ua ntej los lawm, txoj kev tawm tsam kev tsis ncaj ncess tsis yog ib yam uas peb ua ib zaug xwb txawm yuav hloov tau, tiam sis nws yog ib yam uas peb yuav siv tas peb lub neej los tawm tsam kom hloov uas yog ib lub luag hauj lwm uas peb yuav xyaum taug raws nraim li Yes Xus txoj kev.

Peb twb txog rau qhov uas yuav tig tsis tau tej huab cua rov qab lawm, tib neeg lub neej uas yuav huaj vam ntws nyob rau hauv peb daim av no nyob rau ntawm qhov nruab nrab lawm xyov yuav mus rau sab twg.  Peb thawj qhov uas yog tib neeg lub neej yog coj thiab ua raws li Tswv Ntuj tau tsim los, tiam sis peb twb ua tsis tau raws li ntawd.  Tej teeb meem tab tom tshwm sim muaj feem cuam tshuam nrog tej huab cua yuav muajfeem cuam tshuam nrog kev ntxub ntxaug kev tsis ncaj ncees, kev txom nyem los kev pluag, txoj kev tsis ncaj ncees ntawm poj niam thiab txiv neej los twb muaj feem cuam tshuam txog kaj teb kam chaws nrog.

Kuv xav thov kom nej tshwj zias ib lub lis piam ib hnub los ua kev lees txhaum rau tej yam uas peb tau ua xws li: saib tsis taus tej neeg txawv nqaij txawv tawv thiab kev tsis txuag lub ntiaj teb daim av, tej zaum tej kev phem ntawd yeej ib txwm muaj nyob hauv koj tus kheej lub neej los lawm, peb yuav tau nrhiav kev los pab thov ntuj pab kom tej kev phem ntawd txawj nploj mus.  Kev yoo tshaib yog ntau ntau haiv neeg txheej thaum ub lawv muaj los tswj tuav lawv txoj kev ntseeg, peb los yeej muaj li ntawd thiab, yog ib txoj kev cai uas lawv yeej ua tib zoo xav zoo zoo tseg lawm--- tab txawm yog noj nqaij kom tsawg, yoo khoom noj, tseg tej yam tshuaj muaj yees, tseg tsis mus saib tej yam tso tawm hauv youtube los facebook—uas peb nyiam mus saib uas yuav xiam peb lub sij hawm tsis tau siv rau lwm tus thiab rau lub ntiaj teb. 

Thov Ntuj rau tus Ntsuj Plig lub Hwj Chim

Niaj hnub thov ntuj yog kev coj hauv lub neej ua neeg ntseeg: yog dej yug peb tus ntsuj plig.  Nws yuav muab peb tus ntsuj plig los ua ke nrog rau Tswv Ntuj tus ntsuj plig, thiab yuav pab kom ob tug ntsuj plig ntawd ua hauj lwm ua ke, rau peb thiab nyob nrog peb.  Nyuam qhuav no peb tau hais kom sawv daws sim siv qhov Spirittual practices no rau lub caij Plaub Caug.  Kuv muab cov zaj no rau nej, thiab hais kom txhua tus ntseeg nyob hauv Minnesota no thov Tswv Ntuj tus Ntsuj Plig txhua txhua hnub kom nws nchuav nws txoj kev hlub los rau peb lub Koom Txoos, kom peb tej pawg ntseeg me me tau ua tim khawv pom txog nws txoj kev hlub rau hauv lub ntiaj teb uas tab tom raug kev txom nyem, kev ntshai, kev sib ntxub.  Thov kom peb nrhiav ib lub caij me me txhua txhua hnub, txawm yog hais tias 5 nas this thaum koj tseem tos kas fes sov xwb los xij, thaum tav su, los yog ua ntej koj yuav mus pw los xij, ua tib zoo hais lus rau Tswv Ntuj thiab  mloog nws tej lus hais rau peb, qhia tej yam koj ntxhov siab los yog txhawj rau Tswv Ntuj, los yog ua Tswv Ntuj tsaug los ntawm koj lub neej, rau peb lub Koom Txoos ECMN, thiab rau peb lub ntiaj teb. 

So

Kuv tau pom peb cov thawj coj los yog cov Txiv Plig/Cov Xib Hwb nyob qhov txhia chaw uas kuv tau mus, lawv txoj kev nkees qaug zog los ntawm lawv tus ntsuj plig thiab lawv lub cev.  Ob lub xyoo dhau los yog lub caij uas peb sab kawg nkaus, zoo nkaus li qhov muag twb tsis tshua pom kev, tiam sis qhov peb sab ntawd tsis yog ua hauj lwm rau Tswv Ntuj los yog ua kom Tswv Ntuj nto npe li. Nyob rau hauv ntawv Hes Nplaws, hnub xas npas tos – yog txoj kev so ib lub lis piam ib zaug - kuj tseem yog ib lub  caij tawm tsam txoj kev phem uas qhia rau peb tias tib neeg tsuas muaj nqis thaum lawv ua tau tej yam tshwm sim los xwb, tsis yog lawv tus kheej yeej muaj nqis. Hnub xas npas tos rov qhia rau peb tias peb yog leej twg thiab peb yog leej twg li, thiab rov qhia rau peb dua tias Tswv Ntuj tsim peb los, tsis yog tsim los khwv kom lwm tus nplua nuj, tiam sis yog vim tus Tsim peb txoj kev hlub.  Kuv xav kom txhua tus neeg ntseeg Episcopal hauv Minnesota xyaum coj tus cuj pwm nres es so me ntsis txhua txhua lub lis piam. Vim yog txoj kev saib xyuas yus tej txheeb ze los tej phooj ywg los yog yus lub luag hauj lwm mas yuav kom ib lub lis piam tau so ib hnub mas yuav nyuaj heev, tab sis qhov hu ua so no yog nrhiav ib lub caij hauv ib lub lis piam kom tau so yus lub paj hlwb, lub tswv yim, los lub cev, kuv thov caw nej nrhiav ib lub sij hawm hauv ib lub lis piam los so lub tswv yim los rov pib dua tshiab. 

Kev lees txhaum thiab kev yoo tshaib, kev thov ntuj, thiab kev so:  Kuv ntseeg tias yog peb mob siab xyaum tiag tiag tej yam uas xav kom peb uas nyob rau hauv lub caij Plaug Caug no yuav pab kom peb tiv taus txoj kev phem uas raug rau peb lub neej niaj hnub no, thiab yuav pab kom peb ua tau peb lub neej raws li peb lub zeem muag hauv ib lub koom txoos zoo li Yes Xus__ xws li ib pab neeg me me uas ua tau ib yam loj loj rau peb lub ntiaj teb los ntawm lub zog los ntawm txoj kev hlub. Nyob rau hauv 5 lub lis piam tom ntej no, peb yuav nrog Yes Xus taug kev hauv txoj kev raug ntxias, kev tshaib plab, kev nqhis dej, kev saib tsis taus, ntxias dag, ntxeev siab, kev raug tsim txom, thiab kev tuag.  Txawm yog hais tias koj los yog lub ntiaj teb no yuav raug qhov xwm txheej twg niaj hnub no, peb yuav tsum to taub tias Yes Xus haj yam nyob ze peb thiab dua qhov peb xav tau.  Thaum peb nrog Yes Xus taug kev  niaj hnub no, peb nyob ze heev rau txhua tus uas lawv, raws li Howard Thurman zaj lus uas nws hais tias cia lawv sab nrob qaum tig rau ntawm phab ntsa, peb sawv daws yuav paub thiab to taub txog qhov tseeb ntawm Yes Xus txoj kev hlub, txoj kev tuag thiab txoj kev sawv rov los: Yes Xus tus ntoo cuam, txoj kev hlub, thiab qhov tseeb ntawm txoj sia thiab kev thaj yeeb.

Kuv ua Tswv Ntuj tsaug uas nws cia kuv taug nws txoj kev nrog nej txhua tus.  Thov kom nej tau txais Tswv Ntuj lub ntxiaj ntsim hauv lub caij Plaug Caug no.

Thov lub txiaj ntsim thiab kev thaj yeeb,

The Right Reverend Craig Loya
X Bishop
Episcopal Church in Minnesota